AzMİ: Elektron cihazlarda vaxt fərqləri istifadəçilərdə çaşqınlıq yaradır

Azərbaycanda vaxt göstəricilərində uyğunsuzluqlar problem olaraq qalır.

"Ens.Az" xəbər verir ki, bunu Prezident yanında Antiinhisar və İstehlak Bazarına Nəzarət Dövlət Agentliyinin tabeliyində olan Azərbaycan Metrologiya İnstitutunun (AzMİ) laboratoriya müdiri Şamxal Abbasov qurumda təşkil olunan təlim çərçivəsində deyib.

Onun sözlərinə görə, Azərbaycanda müxtəlif elektron cihazlarda göstərilən vaxt arasında uyğunsuzluqların müşahidə olunması dəqiq vaxt ölçmələri sahəsində mövcud problemlərdən biri kimi qiymətləndirilir: "Televiziya ekranları, elektron saatlar və digər cihazlarda göstərilən vaxt bəzən faktiki vaxtla üst-üstə düşmür. Nəticədə müəyyən proqramların və ya yayımların elan olunan vaxtda başlamaması istifadəçilər arasında çaşqınlıq yaradır. Hazırda ən etibarlı vaxt mənbələrindən biri mobil telefonlardır. Telefonlar internet vasitəsilə beynəlxalq vaxt serverləri ilə mütəmadi əlaqə saxlayaraq saatlarını avtomatik sinxronlaşdırır və mümkün vaxt fərqlərini aradan qaldırır.

Ş. Abbasov qeyd edib ki, vaxt göstəricilərindəki uyğunsuzluqların aradan qaldırılması üçün ölkədə vaxt etalonlarının inkişaf etdirilməsi, dəqiq vaxt siqnallarının yayım imkanlarının genişləndirilməsi və dövlət qurumlarının bu sahədə vahid mənbədən istifadə etməsi istiqamətində işlər aparılır: "Dəqiq vaxt məlumatının təmin edilməsi rabitə, yayım, nəqliyyat və digər kritik infrastruktur sahələrinin etibarlı fəaliyyəti üçün vacib şərtlərdən biridir".