“Çelsi” klubu yeni baş məşqçinin rəhbərliyi altında Premyer Liqaya qələbə ilə başlayıb

Avqustun 11-də İngiltərə Premyer Liqasının 2018-2019-cu il mövsümünün birinci turunun növbəti oyunları keçirilib.

AZƏRTAC xəbər verir ki, turun maraqla gözlənilən oyunlardan biri “Con Smit Arena”da keçirilib. “Haddersfild” klubu doğma meydanda “Çelsi”ni qəbul edib. Qarşılıqlı hücumlar şəraitində keçirilən matçda hesab 34-cü dəqiqədə açılıb. Nqolo Kante fərqlənib - 0:1. Hücumlarını davam etdirən London təmsilçiləri fasiləyə kimi yenidən fərqlənib. İlk hissənin sonuncu dəqiqəsində klubun yeni transferi Jorjinio 11 metrlik cərimə zərbəsini dəqiq tamamlayıb - 0:2. Komandalar fasiləyə bu hesabla yollanıblar.

Fasilədən sonra hücumlarını davam etdirən Maurisio Sarinin yetirmələri 80-ci dəqiqədə üçüncü topu ev sahiblərinin qapısından keçiriblər. Eden Hazardın künc zərbəsindən ötürməsini Pedro qolla tamamlayıb - 0:3.

Turun digər oyunlarında “Burnemut” klubu “Kardiff” komandasını 2:0 hesabı ilə məğlub edib. “Nyukasl” komandası doğma meydanda “Tottenhem”ə məğlub olub - 1:2. “Kristal Palas” səfərdə “Fulham”a (2:0), “Vatford” doğma divarlar arasında “Brayton end Hove Albion” klubuna (2:0) qalib gəlib.

Tura avqustun 12-də yekun vurulacaq.