Hollandiyada kilsələr satılır

Son 50 ildir ki, Hollandiyada kilsəyə gedənlərin sayının sürətlə azalması, boş qalan və satışa çıxarılan kilsələrin sayını artırıb.

“A24.az” xarici mediaya istinadən xəbər verir ki, ölkənin bir çox yerində çoxlu sayda kilsə ərazisiylə birlikdə satışa çıxarılıb. Beləliklə, qarşıdakı 10 il ərzində təqribən minə yaxın kilsənin boşaldılacağı gözlənilir. Kilsələrin satılmasında başlıca səbəb isə ibadət üçün kilsəyə gedənlərin azalmasıdır.

Hollandiyanın cənubundə yerləşən Vaalvijk şəhərindəki “Sint-Clemens” kilsəsindən Anton van Diessen “təssüf edirəm, kilsəmiz satışa çıxarılıb. Artıq insanlar tanrıya inanmır” deyib.

Bunu məyusluqla bildirən hollandiyalı din xadimi üzüntüsünü bu cür izah edib: “Sadəcə mənim üçün deyil, camaat üçün də belədir. Onların şəxsi tarixlərinin bir hissəsi də yox olacaq. Burada vaftiz olunmaq, toy mərasimi, cənazə kimi bir çox hadisələr birlikdə yaşanır”.

Getdikcə inanclı insanların və dini icmaların azaldığını deyən Van Diesen artıq kilsələrin yanacaq, sığorta və təmir işləri kimi bir çox xərcləri ödəyə bilmədiyini də qeyd edib.