Kasım-Jomart Tokayev sanksiyaların ləğvinə görə İlham Əliyevə təşəkkür etdi

"Sanksiyaların ləğv edilməsi və ölkəsinin ərazisi üzərindən birbaşa ikitərəfli ticarət üçün şərait yaradılması qərarına görə Azərbaycan liderinə minnətdarlığımı bildirirəm".

Oxu.Az-ın "Akorda" nəşrinə istinadən xəbərinə görə, bu sözləri Qazaxıstan Prezidenti Kasım-Jomart Tokayev Astanada Ermənistanın Baş naziri Nikol Paşinyanla keçirdiyi birgə brifinqində deyib.

"Beləliklə, bu ilin noyabr ayında Azərbaycan ərazisi üzərindən Ermənistana Qazaxıstan buğdasının 1000 ton həcmində ilk partiyası çatdırılıb. Bu təşəbbüs xüsusi siyasi və iqtisadi əhəmiyyət kəsb edir. Qazaxıstan müntəzəm olaraq Ermənistana yüksək keyfiyyətli taxıl məhsulları və digər mallar tədarük etməyə hazırdır. Biz bu istiqaməti daha da inkişaf etdirmək üçün bütün səylərimizi göstərməyə razılaşdıq. Prioritet məsələlərdən biri iki ölkə arasında birbaşa hava əlaqəsinin açılması və hava yük daşımalarının təşkilidir. Bu sahədə artıq konkret planlar mövcuddur və tərəflər yaxın gələcəkdə onları həyata keçirməyə başlayacaqlar", - deyə Tokayev bildirib.