Trampdan avtoritar lider olması ilə bağlı etiraf: "Həqiqətən, heç istəməzdim ki, belə düşünsünlər"

ABŞ Prezidenti Donald Tramp bütün hakimiyyəti öz əlində cəmləşdirmək və avtoritar liderlik niyyətində olmadığını bəyan edib.

Ens.az Oxu.az-a istinadən xəbər verir ki,o, bu barədə ABC televiziyasına müsahibəsində deyib.

Trampdan bəzi ABŞ vətəndaşlarının "onun əlində həddindən artıq səlahiyyət cəmləyib avtoritar prezidentə çevrilməsi" ilə bağlı narahatlıqlarına münasibət bildirməsi xahiş olunub.

"Mən həqiqətən, heç istəməzdim ki, onlar belə düşünsünlər. Mən yalnız bir işlə məşğulam - ABŞ-ni yenidən möhtəşəm edirəm. Ölkəmiz tənəzzülə uğramışdı. Bütün dünya ölkəmizə gülürdü. Bizim həddinən artıq bacarıqsız liderimiz var idi", - deyə ABŞ prezidenti cavab verib.

Qeyd edək ki, aprelin 27-də ABC, "The Washington Post" və "Ipsos" sosial xidməti tərəfindən yayımlanan birgə sorğuya əsasən, ABŞ vətəndaşlarının 56%-i Trampın səlahiyyətlərini aşdığını hesab edirlər. Respondentlərin 49%-i hesab edir ki, Tramp ölkənin qlobal liderliyini gücləndirmək əvəzinə zəiflədib.