Türkiyəli nazir: "Zəngəzur dəhlizi 2030-cu ilə qədər istifadəyə veriləcək"

"Zəngəzur dəhlizi 2030-cu ilə qədər istifadəyə veriləcək".

Ens.Az xəbər verir ki, bu barədə yerli mətbuata Türkiyənin nəqliyyat və infrastruktur naziri Abdulkadir Uraloğlu məlumat verib.

Zəngəzur dəhlizi üçün 224 kilometrlik Qars-Iğdır-Aralık-Dilucu dəmir yolu xəttinin əhəmiyyətini vurğulayan nazir layihənin təməlinin ötən il qoyulduğunu və hazırda işlərin davam etdiyini xatırladıb.

Zəngəzur dəhlizi ilə bağlı Uraloğlu qeyd edib:

"Azərbaycan tərəfi də işlərini davam etdirir. Çox güman ki, bu il Naxçıvanda işlər başlayacaq. Bir il ərzində bu məsələdə irəliləyiş gözləyirik. 2030-cu ilə qədər Zəngəzur dəhlizini işə salacağıq".

Türkiyə hakimiyyətinin əvvəllər bildirdiyi kimi, Türkiyənin şərqindəki Qars şəhərindən Naxçıvana dəmir yolu xəttinin istifadəyə verilməsi ildə təxminən beş milyon insanın və 15 milyon ton yükün daşınmasına imkan verəcək. Layihənin 2.4 milyard avroya başa gələcəyi təxmin edilir.

Xatırladaq ki, 2025-ci il avqustun 8-də Vaşinqtonda ABŞ Prezidenti Donald Trampla üçtərəfli görüşdən sonra Azərbaycan lideri İlham Əliyev və Ermənistanın baş naziri Nikol Paşinyan Bakı ilə İrəvan arasında Azərbaycanın əsas hissəsi ilə Naxçıvan arasında nəqliyyat əlaqəsinin yaradılması haqqında birgə bəyannamə imzalayıblar. Bu layihə "Beynəlxalq Sülh və Rifah üçün Tramp Marşrutu" (TRIPP) adlandırılıb.