ABŞ-dən İrandakı vətəndaşlarına ÇAĞIRIŞ: "Dərhal tərk edin"

ABŞ-nin İrandakı səfirliyi islam respublikasındakı gərginlik fonunda bu ölkədəki vətəndaşlarına müraciət edib.

Ens.az Oxu.az-a istinadən xəbər verir ki,müraciət ABŞ-nin İrandakı səfirliyinin rəsmi saytında dərc olunub.

Açıqlamada İranda vəziyyətin getdikcə gərginləşdiyi vurğulanır və bildirilir ki, bundan sonra da zorakılıq, həbslər və xəsarətlərin davam edəcəyi istisna edilmir.

"Dərhal İranı tərk edin. İrandan çıxış planı hazırlayın. Təhlükəsizdirsə, İranı quru yolu ilə tərk etməyi, Türkiyəyə və ya Ermənistana keçməyi düşünün", - deyə səfirlik qeyd edib.

O da bildirilir ki, İran hökuməti ikili vətəndaşlığı tanımır, ABŞ və İran ikili vətəndaşlığı olan şəxslərə yalnız İran vətəndaşları kimi yanaşacaq.

Xatırladaq ki, 2025-ci il dekabrın 29-da Tehranda İran rialının kəskin düşməsi səbəbindən ticarətçilərin etiraz aksiyaları başlayıb. Bir gün sonra etirazlara tələbələr də qoşulublar. Narazılıqlar qısa müddətdə İranın əksər iri şəhərlərinə yayılıb. 2026-cı il yanvarın 2-də vəziyyət daha da gərginləşib - şəhər küçələrində naməlum silahlı qruplar peyda olub. Etirazçılarla hüquq-mühafizə orqanları arasında silahlı toqquşma halları artıb.

İğtişaşların zirvəsi 8 yanvar axşamına təsadüf edib, bu zaman ən azı 12 mülki vətəndaş, o cümlədən bir uşaq həlak olub. Hakimiyyət orqanları 25 hüquq-mühafizə əməkdaşının həlak olduğunu bildirib. Tehran meri Əlirza Zakani deyib ki, etirazçılar paytaxtda 25 məscidi yandırıb, 26 bank, üç tibb mərkəzi, 10 dövlət müəssisəsi, 48 yanğınsöndürən maşın, 42 avtobus və təcili yardım maşını, həmçinin 24 mənzilə ziyan vurublar. İran hakimiyyəti iğtişaşçıları terrorist adlandırıb və hadisələrin təşkilində İsrail və ABŞ-ni təqsirləndirib.