İsveçrə görüşü yekunlaşdı: İran və ABŞ hansı məsələlərdə razılaşdı?

İran nümayəndə heyəti İsveçrənin Bürgenstok şəhərində ABŞ ilə aparılan danışıqlardakı fəaliyyətini bu mərhələdə yekunlaşdırıb.

Ens.az Oxu.az-a istinadən xəbər verir ki, bu barədə "Tasnim" agentliyi İslam Respublikasının Xarici İşlər Nazirliyinin sözçüsü İsmayıl Bəqainin açıqlamasına istinadən məlumat yayıb.

"Hazırkı mərhələdə nümayəndə heyətinin danışıqları başa çatıb, lakin texniki komandalar iyunun 22-də işlərini davam etdirəcəklər", - deyə sözçü bildirib. O əlavə edib ki, yekun müqavilənin hazırlanması müzakirə edilib və imzalanmış anlaşma memorandumunun icrası üçün vacib olan məsələlər üzrə məsləhətləşmələrin davam etdirilməsinə qərar verilib.

Bildirilir ki, əsas müzakirə prosesi 80 dəqiqə davam edib. Bundan sonra Tehran emissarları daxili məsləhətləşmələr aparıblar. Telekanalın məlumatına görə, İran parlamentinin sədri Məhəmməd Baqir Qalibaf ABŞ və vasitəçilərlə görüş zamanı anlaşma memorandumunun müddəalarının tam şəkildə icra olunmasını tələb edib.

ABŞ və İran arasında vasitəçi rolunu oynayan Qətər və Pakistan da İslamabad memorandumunun icrasına dair Bürgenstokda keçirilən danışıqların ilk mərhələsinin bitdiyini bəyan ediblər. Qeyd olunub ki, bu proses müsbət və konstruktiv şəraitdə keçib.

İsveçrənin Bürgenstok şəhərində keçirilən dördtərəfli məsləhətləşmələrin iştirakçısı olan ölkələr danışıqların gedişinə nəzarət etmək məqsədilə xüsusi komitənin yaradılmasını razılaşdırıblar. Nümayəndə heyətlərinin rəhbərlərinin mütəmadi olaraq həmin quruma hesabat verəcəyi planlaşdırılır.

"Anlaşma memorandumuna əsaslanaraq tərəflər, vasitəçilik prosesi üzərində siyasi nəzarəti həyata keçirəcək yüksəksəviyyəli komitənin təsis edilməsi barədə razılığa gəldilər. Danışıqlar aparan qrupların rəhbərləri mütəmadi şəkildə komitəyə hesabat verəcək, eyni zamanda nüvə problemi, sanksiyalar, monitorinq və mübahisələrin həlli ilə məşğul olan işçi qruplarına rəhbərlik edəcəklər. Məqsəd memorandumun səmərəli şəkildə icrasını və digər məsələlərin həllini təmin etməkdir", - Qətər və Pakistanın birgə bəyanatında qeyd olunur.

"İsveçrənin Bürgenstok şəhərində İslamabad anlaşma memorandumu çərçivəsində İran İslam Respublikası, Amerika Birləşmiş Ştatları nümayəndələrinin və iki vasitəçi tərəfin - Qətər Dövləti ilə Pakistan İslam Respublikasının iştirakı ilə yüksəksəviyyəli danışıqların birinci raundu başa çatıb. Görüş müsbət və konstruktiv mühitdə baş tutub. Ümidverici irəliləyişlər əldə edilib, o cümlədən gələcək texniki danışıqların aparılması üçün zəmin yaradılıb", - deyə Qətər və Pakistanın birgə bəyanatında qeyd olunur. Bildirilib ki, Bürgenstokdakı məsləhətləşmələrdə iştirak edən ölkələr ABŞ və İran arasında yekun razılaşmanın əldə olunması üçün yol xəritəsini işləyib hazırlayıblar.

"Yüksəksəviyyəli komitə 60 gün ərzində yekun razılaşmaların əldə edilməsi üçün yol xəritəsini təsdiqləyib və sonrakı texniki müzakirələrin dərhal başlanması üçün əsas yaradıb. Bundan əlavə, ticarət gəmilərinin Hörmüz boğazından təhlükəsiz keçməsini təmin etmək, eləcə də insidentlərin və anlaşılmazlıqların qarşısını almaq məqsədilə tərəflər arasında rabitə xətti qurulub", - deyə Pakistan və Qətərin ortaq açıqlamasında bildirilib.

Məsələ ilə bağlı İslam Respublikasının xarici işlər naziri Abbas Əraqçı da açıqlama verib. O bildirib ki, İsveçrənin Bürgenstok şəhərində aparılan müzakirələr zamanı Tehran, Pakistan və Qətərin köməyi sayəsində neft ixracı və dondurulmuş İran aktivlərinin bərpası da daxil olmaqla, bir sıra məsələlərin həllini razılaşdırıb.

"Qətər və Pakistanın davamlı vasitəçilik səyləri nəticəsində Livan müharibəsinin dayandırılması istiqamətində mühüm nailiyyətlər əldə olunub. Neft və neft-kimya məhsullarının ixrac rüsumları ləğv edilib, blokada götürülüb, bəzi dondurulmuş aktivlər sərbəst buraxılıb və İranın bərpası, eləcə də inkişafı üçün irimiqyaslı plan işə salınıb", - deyə A.Əraqçı "X" hesabında yazıb.

"Axios" nəşrinin müxbiri Barak Ravidin sözlərinə görə, Vaşinqton danışıqların gedişindən razı qalıb.