Moskvaya genişmiqyaslı dron hücumu: Yaralılar və ciddi dağıntılar var

Ötən gecə Rusiya paytaxtı və Moskva vilayəti kütləvi şəkildə pilotsuz uçuş aparatlarının (PUA) hədəfi olub. Zərbələr nəticəsində "Wildberries" şirkətinin iri logistika komplekslərindən birində, həmçinin neft anbarında və sənaye zonasında yanğın qeydə alınıb.

Ens.az Oxu.az-a istinadən xəbər verir ki,Moskva meri Sergey Sobyanin region istiqamətində 400-dən çox pilotsuz təyyarənin uçduğunu bildirib.

Onun sözlərinə görə, PUA-ların böyük hissəsi uzaq məsafədə zərərsizləşdirilib, 85-i isə Moskvaya yaxınlaşarkən məhv edilib.

Səhər saatlarında sosial şəbəkələrdə Moskva vilayətinin Podolsk şəhərində yanğınların foto və videoları yayılmağa başlayıb. İlkin məlumata görə, Lvovski mikrorayonundakı neft bazası vurulub.

Bununla yanaşı, Podolsk ərazisindəki "Wildberries"ə məxsus Koledino logistika bazasının PUA zərbəsinə məruz qaldığı və işçilərin təxliyə edildiyi bildirilir. İnternetdə yayılan videolarda yanğın görünür və bəzi mənbələr "Wildberries"in eyni vaxtda iki anbarının vurulduğunu ehtimal edir.

Koledino qəsəbəsində "Wildberries"in ən nəhəng distribütor mərkəzləri və anbar komplekslərindən biri fəaliyyət göstərir.

OSINT tədqiqatçılarının məlumatına görə, Koledinodakı baza və Lvovskidəki neft terminalı ilə bərabər, Domodedovo bölgəsindəki "Cənub Qapıları" sənaye parkında da yanğın baş verib.

Şəhər dairəsi rəhbəri Yevgeniya Xrustalyovanın sözlərinə əsasən, yanğının qarşısı alınıb və tam söndürülməsi istiqamətində işlər aparılır.

Eyni zamanda, Cənub mikrorayonunda bir dronun çoxmərtəbəli yaşayış binasına çırpılması nəticəsində binanın xarici görünüşünə ziyan dəyib.

"Cənub Qapıları" sənaye zonası 144 hektar sahəni əhatə edən və ümumi ərazisi 650 min kvadratmetri aşan böyük anbar infrastrukturudur. Mövcud anbar obyektlərinin sahəsi 180 min kvadratmetrdən genişdir.

Eləcə də Motovilovo ərazisindəki "Qrivno" sənaye parkının da zərbəyə məruz qaldığı qeyd olunur.

Regionda gecə ərzində iki nəfər xəsarət alıb: biri fərdi evdə baş verən yanğın zamanı, digəri isə pilotsuz təyyarənin avtomobilin yanına düşdüyü M-4 trasında. Xrustalyovanın məlumatına görə, ümumilikdə müxtəlif dərəcəli xəsarət almış altı nəfər Domodedovo xəstəxanasındadır. Bir kişi ağır vəziyyətdədir, həkimlər onun həyatı uğrunda mübarizə aparırlar.

Daha əvvəl Moskva vilayətinin rəhbəri Andrey Vorobyov Moskva vilayətinə PUA hücumu nəticəsində iki nəfərin xəsarət aldığını, bir sıra evlərin və mülki infrastrukturun ayrı-ayrı obyektlərinin zədələndiyini bildirmişdi.