Tramp: "Xamenei danışıqlarda iştirak edir"

"Vaşinqtonla Tehran arasındakı danışıqlar sürətlə irəliləyir".

Ens.az Oxu.az-a istinadən xəbər verir ki, bu barədə ABŞ Prezidenti Donald Tramp "New York Post" nəşrinə verdiyi müsahibəsində bildirib.

Onun sözlərinə görə, İslam Respublikası nüvə silahı istehsalından əl çəkməyə razılıq verib və iki ölkə arasındakı ehtimal olunan müqavilə nəticəsində çoxlu müsbət dəyişikliklər baş verəcək.

Eyni zamanda, Ağ Ev rəhbəri bildirib ki, İranın Ali Lideri Müctəba Xamenei danışıqlar prosesi zamanı qərarların qəbul edilməsində iştirak edir. Tramp İranın dəniz blokadasının bu ilin sentyabr ayına kimi qüvvədə qalacağını istisna etməyib.

Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.

İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.

Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.

İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.

Həmçinin Hörmüz boğazından gəmilərin keçidində ciddi problemlər yaranıb.

Aprelin 8-də Donald Tramp Tehrana verdiyi ultimatumun vaxtının bitməsinə bir neçə saat qalmış Vaşinqtonun ikihəftəlik atəşkəslə razılaşdığını elan edib.

Daha sonra İslamabadda tərəflərin ilk görüşü keçirilib.

Aprelin 22-nə planlaşdırılmış ikinci görüş isə baş tutmayıb.