Venesuelada neft buruğunda partlayış: Xəsarət alanlar var
Venesuelanın Apure ştatında PDVSA dövlət neft şirkətinin obyektində qəza baş verib.
Oxu.Az xarici KİV-ə istinadən xəbər verir ki, Quafita neft yatağındakı COLVEN-02 yerüstü qazma qurğusunda baş verən partlayış nəticəsində azı səkkiz işçi xəsarət alıb.
Onlardan altısında II və III dərəcəli yanıqlar qeydə alınıb.
Zərərçəkənlərin vəziyyətinin ağır olması və ərazidə tibbi imkanların məhdudluğu səbəbindən təcili tibbi yardım Kolumbiyanın xilasedici xidmətləri tərəfindən göstərilib. Yaralılar sərhəddən keçərək Kolumbiyanın Arauka departamentinin Araukita bələdiyyəsindəki tibb müəssisələrinə çatdırılıblar.
PDVSA qəzanın səbəbləri ilə bağlı hələ rəsmi açıqlama verməyib. Yerli sakinlər hadisəni avadanlıqların güclü aşınması və təhlükəsizlik qaydalarına əməl edilməməsi ilə əlaqələndirirlər.
Şərhlər
Şərhləri göstər Şərhləri gizlət